Plaza Premium 環亞機場貴賓室

Location: 離境大堂 (近Gate 1, 35 & 60)

如果入到其他lounge、又或者入唔到其他而又好想入lounge,我先會建議大家用呢個最簡單既方法入Plaza Premium。呢個lounge無論咩時候都係超多人,如果唔介意排隊同熱鬧,我就建議大家無謂排隊排到燥啦。以前Plaza Premium 喺Arrival有個lounge,所以都幾常返到黎入去食少少野先返屋企,而家佢摺左就無咩誘因去lu~

要入Plaza Premium最簡單既方法係只要你揸住美國運通Explorer信用卡就免費入到喇!

咁多數大家入去Plaza Premium度做也?就緊係食魚蛋粉啦!開咗一段時間,之後仲新增咗牛丸tim!

唔止咁呀,其實喺lounge度部Carlsberg由下向上斟既啤酒機都好受歡迎,每次都見到有人拍片。

American Express The Centurion Lounge (Platinum) 美國運通貴賓室(白金Charge)

Location: T1 (近Gate 60)

如果想入高質素lounge、唔係人人都入得、唔使排勁長隊、想沖涼、想飲杯靚酒、想嘆TWG荼包、想食蝦餃、想食movenpick雪糕,而你又唔係oneworld綠寶石、藍寶石會員,咁我建議你申請張AE Platinum Charge card入黎呢度啦!年費$7800 (下省略1000字..張卡仲有好多其他優惠)

好多人話要年薪$100萬或者有一定資產先申請到。Ar..我就不予置評喇,不過相信佢會篩選過先俾申請既。

入過AE lounge食野咁多次,味道每一次都好滿意。次次入到去都有蝦餃食,我最中意配XO醬。海蜇、芝士雞翼、青口、庶汁蝦棒等等..全部都好有味道

食完熱食再一路飲返杯cocktail,一路食墨西哥粟米片,最後食雪糕,正!

CX The Bridge Business 國泰航空「逸連堂」商務貴賓室

Location: 西客運廊 5 樓近Gate 35

呢個lounge唔算好大,但亦唔係好細(一陣間你望埋The Deck就知咩叫細)

因為相對無咁大,所以唔算多人,而食物款式同The Wing Business/The Pier Business就好唔同,中意輕便、乜都細細份食下,呢道就岩哂,有pizza、蛋撻、雲吞、菜苗餃、曲奇、生果,味道正常。

食完野又再飲杯cocktail坐喺度欣賞下d飛機都唔錯,drink menu都一樣。

至於你話想沖涼呢,呢道都有提供9間浴室哦。

CX The Deck Business 國泰航空「玲瓏堂」商務貴賓室

Location: T1 (近Gate 6)

The Deck係CX 4個lounge之中最細,但都有8間淋浴室.o.

The Deck雖然比較細,但少人,所以比較清靜。佢都有麵檔 – 「風味坊」The Noodle Bar嫁!但佢既泠盤小食就麻麻地岩我,因為太健康。

佢既麵檔除左最常有既雲吞麵、擔擔麵之外,其實仲有牛腩河同雜菜冬陰功湯麵。

今次黎一杯Chivas Regal先上機~

CX The Pier Business 國泰航空「玉衡堂」商務貴賓室

Location: T1 (近 Gate 65) <同The Pier First位置相若>

由於係室內既關係,The Pier Business一直俾我既感覺係好寧靜relax。

The Pier Business呢個lounge特色係有「瑜逸閣」The Sanctuary by Pure Yoga,一個可以俾你做瑜伽伸展運動同冥想既地方。

至於呢個lounge都有14個淋浴間。

食物方面,都係同The Wing Business一樣有「風味坊」The Noodle Bar可以叫雲吞麵、擔擔麵、菜肉包等等.. 配料大家都一樣有蒜頭、蔥、薑、豆瓣醬等等.. 不過呢道好似靜d咁解=P

酒吧都係一樣咁多選擇。

其實而家入到lounge都少咗好多影相,無乜人都可以影下,但有d太多人既地方就真係好難影到靚相,同埋費是俾職員話騷擾趕你出去啦XD (我都唔想影人,不過咁多人行黎行去,就算自拍,後面咪又影到人~)

希望下次影到批靚相再update落黎俾大家睇啦。

CX The Wing Business 國泰航空「寰宇堂」商務貴賓室

Location: T1 (一過關就係喇!近Gate 1-4)<同The Wing First一樣,只係個入口唔同>

首先一入到黎,已經見到有好多人,不過當然無Plaza Premium咁誇張啦。

喺呢度唔會有餐廳俾你坐低叫A la carte,想食d熱食可以去「風味坊」The Noodle Bar叫碗雲吞麵、叉燒包,同埋一樣啦,佢有個open area位置俾你夾下d小食、parma ham、cheese咁,再攞杯酒坐喺度嘆。

如果以食物款式同環境黎講,或者我可能會揀AE個lounge。畢竟入得lounge都希望坐得舒服d。AE lounge好似無咁多人,而且酒同食物既選擇一定唔會比呢度少,仲有既係AE有得任食movenpick雪糕,而係無一個lounge做到XD

至於沐浴間,The Wing Business雖然無大浴缸,但佢都有23間淋浴間俾大家用嫁。(AE都有XD)

CX The Pier First 國泰航空「玉衡堂」頭等貴賓室

Location: T1 (近 Gate 63)

每次一入去The Pier First 就即刻要排massage嗰邊,排過20次,終於有一次入到><

喺呢度可以免費按摩15分鐘嫁-v- 可選頭肩頸、眼部或足部。

相比The Wing First,你又會選擇大浴缸定黎呢度呢?

Why not both? haha XD 但呢度真係好難排隊,因為我試過無論我係撘最早機黎,抑或撘最夜班機走,都係無位。

講完呢度既signature,咁就緊係要講下呢度既餐廳啦。我個人黎講就覺得呢度個餐廳食物水準係好過The Wing First,我覺得呢度炒既野食比較有鑊氣,同比較入味。

對比返2019 Dec同2020 Feb個menu,其實都係差唔多款式,只係d配料唔同。

我就十分推介佢整既Seafood類別(Seafood linguine/ Seafood fried rice),因為食過咁多次都炒得好香。而同一款食品,我都同一日喺The Wing First度食過,味道無咁出眾。

而佢最保險好食既食品就緊係和牛漢堡配薯條啦XD 香口野有邊個唔岩~

另一道款式,我係十分之讚揚既係佢既湯。瑤柱蟲草湯好滋潤@[email protected] 份量雖然唔多,但起碼有得飲先呀!仲有鮑魚椰子煲雞,算係咁啦。

仲有就係佢既甜酸蝦,都整得好好味呀。仲有個甜酸sticky pork ribs都ok,不過甜酸蝦好食d。

喺餐廳度食飽野,緊係要出返去 「悠然軒」 坐下啦。呢度係室內,而The Wing First係室外,所以感覺好唔同,呢道清靜好多。坐低飲杯洒,食下小食甜品都唔錯。

呢道個「酌醇吧」好有格調,而且好優雅,顏色令人好舒服,好過The Wing First好多XD

重點係呢度有個好有技術、好健談、又靚仔既bartender,整左杯由內到外都無得彈既cocktail俾我>0<!!嘻嘻..

我一路睇住佢整,佢就同其他客人傾計(中英文超流利)。喺開始整嗰時,佢已經將我隻杯用好凍既Acqua Panna礦泉水浸過同漱過,令到我隻杯既温度唔會影響杯cocktail。我真係好欣賞佢的專業態度,因為佢對酒的專業同熱誠,我先可以飲到一杯咁完美、咁好飲的cocktail,以後亦都令我更加嘴刁呢~

我呢杯sparkling kiss,前後沖左2次礦泉水,臨完成之前,仲要將橙皮環繞杯邊一周!謝謝你!送左一杯好正既sparkling kiss俾我!

而喺同一件事上,The Wing First絕對係做唔到。

CX The Wing First 國泰航空「寰宇堂」頭等貴賓室

Location: T1 (一過關就係喇!近Gate 1-4)

喺介紹食物之前,不如等我介紹一下佢呢個lounge主打既Bathroom「浴泉居」先啦!

去The Wing First的「浴泉居」的朋友,記住去到同前臺講我要大浴缸嗰間,如果唔係,佢就會俾細房你嫁啦!

The Wing First同The Pier First既唔同之處分別在於前者賣點係大浴室,後者賣點係15分鐘免費按摩。

哇哇哇!!你睇下。。佢成個浴室加埋的面積可能同我間豆腐屋一樣大T^T

浴缸仲超大,可以俾我玩泡泡浴tim!(雖然我都唔會喺公眾場合玩XD)

不過如果係放左工之後飛,我十分建議黎沖個涼,relax下食埋野先上機!

一般黎講,都要排一陣,次次排緊嗰時都會去餐廳坐低食野先,所以都無理會過排幾耐,不過都好快。

至於佢間餐廳叫「逸雅閣」,早餐同晚餐個A la carte都唔同嫁(個menu同The Pier First有少少出入,同大多數相同,我個人黎講就覺得同一樣野,The Pier First煮得好食d XD 不過The Wing First個location又方便d喎~)

早餐其實每次去都係揀早式或西式
中式多數一定有蝦餃,再配多一件點心、包、粥(配料有皮蛋、油炸鬼、花生、蔥)同一款麵
而西式就有腸仔、蛋、煙肉、蘑菇、番茄、豆、多士

如果見到野食又想過下癮夾下野食的話,餐廳裏面仲有個自助沙律吧,同一d熱食拼盤(食物同menu上相若)

介紹完早餐,不如我都講下晚餐啦。
唔好計佢一年四季都有既雲吞麵同擔擔麵,其實佢main course係好吸引,每次大約有5款揀。

我自己呢就好中意香口野,所以佢既青口配薯條就好岩我
另外佢既Ravioli味道都做得唔錯
炆牛腩都食過幾次,都幾入味
仲有宮保雞丁呀……

所以我次次都喺lounge度食飽飽先上機-v-

如果餐廳既野食都唔岩,或者食完喇,不如出出面個open area坐下,飲杯酒再食下d飯後甜品或冷盤XD

冷盤又點少得parma ham、三文魚、水果

睇真d,原來有老婆餅tim!

不過我中意檸檬撻~

出到open area,可以去bar枱度叫杯cocktail坐低休息下

或者去「凱旋吧」飲杯香檳,坐喺sofa度嘆

下次再入去既時候,記得預留時間去嘆喇!